Нийслэлийн төвийн 6 дүүрэгт байрладаг 11 хүнсний зах, худалдааны төвд хийсэн 32 нэр төрлийн хүнсний бараа бүтээгдэхүүний үнийн 2016 оны 8-р сарын 1-р долоо хоногийн ажиглалтаар өмнөх долоо хоногоос9 нэрийн барааны үнэ тогтвортой, 14нэрийн барааны үнэ буурсан, 9нэрийн барааны үнэ өсчээ.  

Махны дундаж үнэ

2016 оны 8-р сарын1-р долоо хоногт хонины ястай нэг килограмм мах дунджаар6275төгрөг, үхрийн ястай мах нэг килограмм нь дунджаар 7625 төгрөгийн үнэтэй байна. Үхрийн ястай махны үнэ өмнөх долоо хоногтой харьцуулахад 13.2 хувиар буюу 890 төгрөгөөр, үхрийн цул махны үнэ 6.8 хувиар буюу 554 төгрөгөөр нэмэгдсэн байна. Энэ 7 хоногийн ажиглалтаар үхрийн мах “Баянзүрх”, “Хүчит шонхор”,  “Хархорин” хүнсний захуудад хамгийн хямд буюу 6500-7000төгрөг, харин “Меркури” хүнсний захад хамгийн өндөр үнэтэй буюу 10000 төгрөг байна.

Хүснэгт 1. Нэг килограмм махны жижиглэн худалдах дундаж үнэ, 2013-2016 оны сар, төгрөг

* 1-р долоо хоногийн ажиглалтаар

Хонины ястай махны үнэ өмнөх долоо хоногтой харьцуулахад 13.9 хувиар буюу 765 төгрөгөөр өссөн бол хонины цул мах 0.6 хувиар буюу 40 төгрөгөөр буурсан байлаа. Энэ долоохоногийн ажиглалтаар хонины мах “Хүчит Шонхор”, “Хархорин” хүнсний захуудад хамгийн хямд буюу 5300 төгрөгөөр, харин “Меркури” хүнсний захад хамгийн өндөр үнэтэй буюу 8500төгрөгөөр худалдаалж байна.

Гурилын үнэ

2016 оны 8-р сарын 1-р долоо хоногт нийслэлийн хүнсний томоохон зах, дэлгүүрт “Алтан тариа” савласан нэг кг гурилын үнэ дээд зэрэг нь 1200-1500 төгрөг, 1-р зэргийнх 1000-1300 төгрөг, 2-р зэргийнх 780-1000 төгрөг байна.

Худалдан авагч олон байдаг “Хүчит шонхор”, “Таван эрдэнэ”, “Бөмбөгөр”, “Баянзүрх”, “Хархорин” хүнсний захуудад задгайгаар буюу шуудайгаар худалдаж буй нэг кг дээд зэргийн “Алтан тариа” гурилын үнэ 1150-аас 1300 төгрөгийн үнэ ханштай байна. Харин “Барс” хүнсний захад дээд зэргийн “Алтан тариа” гурил 1200 төгрөг, 1-р зэргийн гурил 1000 төгрөгөөр тус тус зарагдаж байна.     

“Атар” талх хүнсний зах, дэлгүүрт 1100-1210 төгрөгийн үнэтэй байна. “Оргил”, “Хархорин” хүнсний захуудад “Атар” талхыг хамгийн хямд буюу 1100 төгрөгөөр, харин “Сансар” супермаркетад хамгийн өндөр үнээр буюу 1210 төгрөгөөр худалдаалж байна.

Төмс, хүнсний ногоо

2016 оны 8-р сарын 1-р долоо хоногийн төмс хүнсний ногооны үнийг өмнөх долоо хоногтой харьцуулахад монгол төмс 7.4 хувиар буюу 80 төгрөгөөр, монгол лууван 12.6 хувиар буюу 320 төгрөгөөр, монгол байцаа 16.9 хувиар буюу 250 төгрөгөөр, монгол манжин 21.6 хувиар буюу 690 төгрөгөөр тус тус буурсан бол хятад сонгины үнэ тогтвортой байлаа.